Får eg presentere X-boksen min?
![](https://blogger.googleusercontent.com/img/b/R29vZ2xl/AVvXsEjYb40R4ufBHHgACPUVe0JBKlKKz5Z3PzX8d4RkcaPLAfIpdbxMyUWVe0zq23oI2i9s3mdlTyT2h6r_WoZLrzXj1UdDXihuHv0DP-q0XGYMcUkQVTffhmCgkYtnTkE1gUgFiAJTQov_VfMI/s400/X-boks+018.jpg)
Ikkje noko moderne plast og elektronikk her i garden, men ein enkel boks bretta av eit kvadratisk ark.
Eg bruker ikkje X-boksen til å spele spel heller, men til å konkretisere korleis vi finn X i likningar.
I matematikken representerer X ein ukjend, når vi stiller opp ein likning, har vi ei venstre- og ei høgreside med eit er-lik-teikn i mellom.
Når vi bruker er-lik-teikn, må vi passe på at det som er på kvar side av teiknet har same verdi. Endrar vi noko på venstresida, må vi gjere nøyaktig same endringa på høgresida. Målet er å få X åleine på ei side, for då finn vi det talet X representerer.
X-boksen er eit godt hjelpemiddel til å vise dette.
Ei enkel likning:
X + 4 = 7
![](https://blogger.googleusercontent.com/img/b/R29vZ2xl/AVvXsEgk5e6eHcmW_mI8WfJ_GxmfSXWyOJ9E4B7LriWxLwGzZz90T6Q1-Dna7Jv8_FKPPuXpw7qN0Oa_1nB-U_iCpmQridOh2zdlRBNMR1rXrAD0ZYxSoeE-b673Xadsa6GMX9S6IqxLV0jKtogc/s320/X-boks+001.jpg)
Vi vil ha X åleine på venstresida, så vi tek bort dei fire som står saman med X, det kan vi gjere dersom vi fjernar like mange på høgresida. Kor mange er det då i X-boksen?
![](https://blogger.googleusercontent.com/img/b/R29vZ2xl/AVvXsEiyP7z44XuV-HzgVe1sIQN90srahqKe8Ua0W2djYzVSlwI141FhcefDNLo4AxrL6vWgv1qlZTqf9xw2c6fS754M80vAhGoprkd_ptMelNNDh553q8VPTaozEjEZPzQO1cQWY2EIoCcsjHWl/s320/X-boks+002.jpg)
På matematikkspråket blir det slik:
X + 4 = 7
X + 4 - 4 = 7 - 4
X = 3
Kan vi få til meir avanserte likningar med X på begge sider? Jada, vi kan brette mange X-boksar:)
2X + 5 = 15 + X
![](https://blogger.googleusercontent.com/img/b/R29vZ2xl/AVvXsEgCu-UE4zo3VMxseyfJXF94Mw3Y9fAHnFlVdas3w5ozQ_Hmy2NSZ3LdGeKWvU2c3hrU3YyLuOR9Pjx1HIPsQePZgpAjA_FqO-WFSSrKZtrJP_X0Bnoy_e6PNkKeJYr2z-JgGdKg6bq8q7a9/s400/X-boks+005.jpg)
Her er det berre å begynne å ta bort - likt på høgre og venstre side - og sjå om du endar opp med det same resultatet som meg:
![](https://blogger.googleusercontent.com/img/b/R29vZ2xl/AVvXsEjPkB-Y6QARI4Y9O_dSe_IzT9VOVH_E1Y361mSsB-k4kQ9cFFJl2lh-JFU_JmxEKCu-JfegcIyYHpGZXquQKU_LAcfPrqwgnMi2R2CfBFsC_-ElZDoWbOZFs5M7UgC0Tu0PyD35olNz76ST/s400/X-boks+008.jpg)
Kva så om det er X minus eit tal på eine sida?
Då kan fargane symbolisere pluss og minus, t.d. blått for minus og raudt for pluss, her er ein enkel likning som viser dette:
![](https://blogger.googleusercontent.com/img/b/R29vZ2xl/AVvXsEjQCsy6ZEJ84MWqlnAtmNQYFaBOjmNE9_iKArjLHotbF0POkvfpMqJVzxDW3k_qYeok7yByRESY0KDiCDAuM1UXOCGDA1jOI4vGfYdkW7PdDK8whdF_oqpmwSlJUH5PXEo0OEKjV11bPIoA/s400/x-3=2page.jpg)
Her legg vi til like mykje på kvar side, slik at pluss og minus opphevar kvarandre:
X - 3 = 2
X - 3 + 3 = 2 + 3
X = 5
Smart lita boks, ikkje sant? No må eg skunde meg å fortelje at dette ikkje er mi oppfinning, eg har lært dette av tilsette ved matematikksenteret i Trondheim:)
Vil du sjå andre sine X-ar i ABC-leiken til Petunia, må du klikke deg inn
her.