søndag 26. oktober 2014

Minnestunder


I sommar døydde tanta vår, ei sprek, flott dame som budde heime til det siste, som ordna seg sjølv med det meste, som hadde ein vond fot, som hadde mykje meir smerter enn vi forstod. I slutten av juni var det eit hjarteinfarkt som tok livet hennar. Ho vart 89 år gammal.

Denne hausten har systera hennar stått i spissen for å rydde i eigendelane og tøme huset etter tanta vår. Det er ikkje mykje eg har hjelpt til, men eit par gongar har eg vore bortom, i alle fall. 

Den eine gongen fann eg eit broderi, ein påbegynt juleduk. Mønstret var teikna på eit innpakningspapir frå 1960-talet.

Eg tenkte at den kunne eg få den flinke systera mi til å gjere ferdig, men ho sa nei.
Då var det ikkje anna råd enn at eg måtte prøve sjølv. Tanken er at yngsteguten min skal få duken, det hastar ikkje, han er 25 år og har forsiktig fortalt meg at dukar, nei, det brukar han ikkje.

Eg er ingen "brodør", men eg klarer no å halde i ei nål, og ein er aldri for gammal til å lære. Mine sting er ikkje av same kvalitet som resten av duken, men det får stå si prøve. 

Duken kom inn i min heim ein gong i september, då såg han slik ut:


Eg starta med "lysestakane", spent på om eg hadde nok tråd, og etter nokre veker kunne eg slå fast at det heldt akkurat:


Neste steg var å gjere heilt ferdig ei side, sjølvsagt den som det var brodert mest på frå før, og no ser duken slik ut:


Her er nærbilete:


Det som er så fint med dette arbeidet er at kvar gong eg set meg i sofaen og broderer eit par trådar så har eg ei lita privat minnestund over tante Åshild. Denne duken vil alltid få meg til å minnast henne, derfor håper eg at gutungen min også vil sette pris på han - ein gong - når han blir stor.

søndag 25. mai 2014

Norske ikon

Jauda, det gjekk bra, her er den originale vrangborda (med feil farge) saman med den nye som eg strikka nedover:)



Dette er den tredje gensaren eg har strikka frå oppskrifthetet "Norske ikoner".
Det finns utruleg mykje fint når ein leitar fram gamle mønster!

Den første gensaren eg strikka frå heftet var "Nancy-gensaren". Eg måtte berre, systra mi strikka den gensaren til seg sjølv som attenåring, eg har aldri gløymt kor fin eg syntest han var...



(eg tok bileta ute, fargane vart ikkje heilt rette)

Så ville Åsta ha seg ein varm gensar til lange dagar på ein kald lesesal. Ho valde "Oslo-gensaren". 


Eg likar å vere effektiv - eller er eg kanskje lat? Eg laga i alle fall rundfelling i staden for å følgje oppskrifta.





Og så var det "Holmenkollen-gensaren". Der eg bomma på fargepartiet då eg kjøpte tråd, og begynte sjølvsagt på feil nøste,  slik at eg måtte ta av vrangborda og strikke den på nytt.




No er eg i gong med den enklaste "Marius-utgåva" til mannen min, men eg trur ikkje det blir med båthals...



Det eg eigentleg skal bruke tida til er oppgåveskriving, den skal vere unnagjort til 3. juni, så no må eg ha rett fokus nokre dagar:)








tirsdag 6. mai 2014

Bomkjøp

Kva gjer ein når ein har kjøpt tråd til gensar og oppdagar at ein har kjøpt eitt nøste av eit anna fargeparti?



Særleg når ein har strikka 8 cm vrangbord med dette eine nøstet, og ikkje innser at fargeforskjellen er for stor før ein har strikka opp to og eit halvt nøste til? 


Rekkjer opp? Niks! Det må då finnast betre alternativ!
Kanskje eg kan opne opp knuten som bind saman nøste nr. 1 og 2, og lirke tråden ut heile vegen rundt?


Det er faktisk muleg å få til:) Men det vil nok ta si tid, og så må eg strikke nye 8 cm vrangbord nedover.... Godt at det ikkje hastar med å få gensaren ferdig - og flaks at butikken hadde igjen fleire nøster av det rette partiet!


søndag 27. april 2014

Vårsøndag

Ein herleg dag:) Sykkeltur i solskin. Blomster over alt:)


Kvitveis i tuer og tepper


Og kusymrer i store klasar oppetter haugane


Utruleg blomstring i år!


torsdag 17. april 2014

No kan gjestene kome

I nokre dagar skal vi få ha jente- barnebarna på besøk. Vi gler oss til vi skal på flyplassen og hente dei i morgon.

Sengene står ferdig oppreidde og vi har leita fram påskepynten


Ein bukett med ranunklar har vi også


Pskeegga er fylte



Og i kjøleskapet står årets påskekake


God påske:)

søndag 6. april 2014

Back to the seventies

Måndag var eg på saniteten sin strikkekafe og laga lampeskjerm av tråd og lim. Ein triveleg og "ruskete" aktivitet:)
Det var greitt å ha eingongshanskar på seg.
Lampeskjemane måtte hengast til tørk, eit vakkert syn:


I dag har eg kjøpt "innmat" til skjermen: ein kveil med lyslenkje, og eg er strålande fornøgd med resultatet; lampen liknar til forveksling slike dei hadde på syttitalet:)


Ha ei fin helg:)

fredag 4. april 2014

Å våren:)

I går måtte eg berre gå av sykkelen og forevige desse på veg heim frå jobb:

: