mandag 11. mai 2009

Kvifor eg stadig vekk skriv om El Camino de Santiago

No er det like før eg skriv eit nytt innlegg om den evinnelege pilgrimsturen vår, eg fryktar at alle de som er innom bloggen min kjem til å gå grundig leie før eg klarer å avslutte følgjetongen min. Tenkte difor eg skulle fortelje kvifor eg er så standhaftig med denne historia.

For det første så var det faktisk FERIEN med store bokstavar for både mannen min og meg, for det andre så har eg eit mål med skriveriet mitt. Vi har fått ei flott bok i julegåve med eldstedattera vår, ei bok som handlar om ferien deira i Spania. Dei har late bileta fortelje heile historia, men det er fullt muleg å kombinere dette med tekst.


Herlege dagar på stranda, på vestsida av Spania er det Atlanteren som kjem inn, så sjøtemperaturen er frisk!

Tanken min er difor å lage ei bok der vi samlar bileta frå pilgimsferda, og sidan vi middelaldrande paret stadig "svekkest på minnet", trur eg det vil vere lurt å ha med litt tekst, så blir det ei verkeleg minnebok. Skriv eg litt og litt på bloggen min, kan vi samle teksten til slutt, og så kan min kjære mann få legge til bilete så mykje han berre vil, før vi sender "manus" inn til FotoKnutsen for "utgjeving" i bokform. Det blir no sjølvsagt gjevt å titulere seg som forfattar, sjølv om det berre blir eitt eksemplar av boka:)

Her frå besøk på ein galisisk restaurant med tradisjonsmat, der ein av rettane på menyen var griseøyrer:)

Eg har fått nokre spørsmål om det eg har skrive hittil, og tenkte eg kunne svare på dei no.
Kor mange land denne pilgrimsruta går innom: Mange pilgrimmar startar i Frankrike, Le Puy er eitt utgangspunkt, Somport eit anna, ein argentinsk gut vi vart kjende med hadde starta ved den heilage kjelda i Lourdes, ein hyggeleg mann frå Basel i Sveits hadde starta frå utgangsdøra si, eit nederlansk par hadde gått frå sin heimby. Ei rute startar i Portugal, men dei fleste startar ein eller annan stad i Spania.

Om det er langt mellom tettstader /byar på vegen: På størstedelen av turen ligg byar og små landsbyar tett, dei strekningane der det er litt avstand mellom byane er godt merka, slik at ein passar på å ta med nok vatn og mat.

Kvar vi skal gå i sommar: I løpet av dei 30 dagane vi hadde til rådvelde klarde vi å gå 700 av knappe 800 km. Det står alstå igjen 8 mil før vi kan seie at vi har fullført caminoen. Det skal vi i sommar, men sidan den vestlege delen av Spania har ein utruleg vakker natur, har vi bestemt oss for å gå om att den finaste delen, og skal difor gå 16 mil i staden for 8.



Her har pilgrimmane også fått plass i Spania-boka.

1 kommentar:

  1. Vi blir ikke lei av å lese om caminoen, skjønner du. Det er veldig interessant lesning. Gleder meg til resten.
    Jeg har også lagd bøker med tekst og bilder fra ferieturene våre i Europa og det er så hyggelig å ta de frem flere år etterpå for å se og lese. En glemmer så fort, så det er veldig smart å skrive bøker. Da kan en også dele opplevelsene med andre.
    Ha en fin uke videre og en flott 17. mai.

    SvarSlett